Oahpahusministtar Anders Adlercreutz (r) buvttii ovdan dáido- ja dáiddaávdnasiid mearkkašumi vuođđooahpahusas (HS 12.8.). Dáiddabajásgeassima dutkin mii guorrasit ministara oidnui. Dutkamušat čájehit čalbmosit, ahte alladásat dáiddabajásgeassin doarju sihke ministara namuhan surggiid, muhto maiddái almmolaš oahppanválmmasvuođaid.

Dáiddabajásgeassima sajádat vuođđooahpahusas lea goittotge hedjonan maŋimuš jahkelogiid. Riikamet skuvlenpolitihkas ráđđe eahpedássedeaddu lohkan- ja dáido- ja dáiddaávdnasiid gaskkas, mii guođđá fuomáškeahttá olbmo ovdáneami oppalašvuođa ja nannodagaid ja beroštumiid girjáivuođa. Vejolašvuohta oassálastit áiggeájanasaide ja stuđeret dáidaga lea fokuseren ain čielgaseappot mánáide ja nuoraide, geaid ruovttus dáidda ja kultuvra gullet juo eallimii. Seammá áigge guoskkahus dáidagii báhcá ollašuvakeahttá ain eanet mánáin ja nuorain. Dát kultuvrralaš sierraárvosašvuođa lassáneapmi lasiha maid nuppi oahpahusministara namuhan čuolmma, segregašuvnna nappo sierraneami.

Vuođđooahpahusa dáiddabajásgeassin rahpá vejolašvuođaid daidda, geat muđui bázášedje dáidaga ja kultuvrra olggobeallái. Ná dat nanne dásseárvvu ja ovttaveardásašvuođa. Dáiddaávdnasiid sajádaga vuođđooahpahusas galgá danin nannet vuhtiiváldimiin dáiddašlájaid girjáivuođa. Vuođđoskuvla galgá dahkat vejolažžan persovnnalaš vásáhusa maiddái dáin dáiddahámiin, mat eai vuos gula oahpahusvuloš ávdnasiidda. Dát dáiddahámit leat ovdamearkka dihte dánsun, teáhter ja sirkusdáidda, main ministara namuhan loaiddastandáidu lea guovddážis.

Alladásat dáiddaávdnasiid oahpahus, mii fáhte buot ohppiid, lea ain eanet mearkkašahtti oassi almmolaščuvgejeaddji skuvlenvuogádagas. Dáiddabajásgeassima fápmu servodaga sierraárvosažžan šaddama vuostá, ferte dovdájuvvot maŋimustá dál suopmelaš skuvlenpolitihkas.

Eeva Anttila
professor

Tuulikki Laes
akademiijadutki

Dáiddauniversitehta

Čálus lea álgoálggus almmustahttojuvvon Helsingin Sanomat -aviissa oaivilčálusin 22.8.2024.