Málle válmmaštallanjoavku attii evttohusa Suoma málles dieđa- ja kulturministtar Hanna Kosonenii. Astoáiggedoaibmahárjeheami Suoma mállii várrejuvvo logi miljovnna dán jahkái. Boahtte jagi rájes ruhtadeapmi lea rámma mielde jahkásaččat 14,5 miljovnna euro.

Málle vuosttaš muttu evttohusas gávnnahuvvo, ahte dan váldomihttomearri lea lasihit mánáid ja nuoraid buresbirgejumi.

“Ulbmil lea dahkat vejolažžan juohke mánnái ja nurrii somás ja nuvttá astoáiggevejolašvuođa skuvlabeaivvi oktavuođas: váldoáššis ovdal dahje ma0.ŋŋel skuvlabeaivvi. Suoma málles ovttastuvvet dat, ahte mánáid ja nuoraid sávaldagat astoáigedoaimmain gullojuvvojit, buorit ja gárvves praktihkat ja doaibmavuogit koordinerejuvvojit, ja skuvlla astoáiggedoibmiid ovttasbargu.”

Suoma dáidda- ja kulturbajásgeassima observatoria lea doaimmastis aktiivvalaččat deattuhan, ahte lihkostuvadettiinis riikkaviidosaš astoáiggedoaibmahárjeheami málle sáhttá váikkuhit olu mánáid ja nuoraid buresbirgejupmái. Observatoria lea ovdanbuktán dássebealát astoáiggedoaimma hárjehanvejolašvuođaid, somás astoáiggebuđaldeami mánáid sávaldagaid mielde ja astoáiggedoaimma hárjeheami pedagogalaš kvalitehta dehálašvuođa oainnu almmuhemiinis. Observatoria lea earret eará evttohan, ahte juohke mánnái dáhkiduvvojit ovttalágán vejolašvuođat astoáiggedoibmii skuvlla oktavuođas dađi lági mielde, ahte mánás lea vejolašvuohta oahpásmuvvat iešguđetlágan astoáiggevejolašvuođaide ja gávdnat dain alcces heivvolaš ja beroštahtti astoáiggevejolašvuođaid ovdamearkka dihte dáidaga ja lihkadeami surggiin.